«Рухани мұра» сериясының келесі кітабы — Кашшафуддин Шаһмарданұлының «Кел, балалар, оқылық!» атты еңбегі.
Молда Кашшафуддин ибн Шаһмардан ибн Ғибадулла ибн
Фатхулла әл-Минзәләуи әс-Сулуки (1864-1920 жж.) — Қарқаралыда қызмет атқарған діни ағартушы, ақын. Қазақ және татар тілдерінде 80 өлең жазып, сөз өнерінің дамуына үлес қосқан.
Ол Қазан қаласындағы Шиһабуддин Маржанидің медресесінде тәлім алған. Маржанидің жанында 9 жыл білім алып, ұстазының қолжазбасын баспаға дайындаған. Уфа
дағы мұсылмандар діни басқармасының емтиханын
сәтті тапсырған соң, Қарқаралы қаласына мұғалімдік
қызметке тағайындалды.
Ақын өмірін зерделеген әдебиеттанушы З.Салқынбаевтың (2003 ж. Қазақ Ұлттық университетінде кандидаттық диссертация қорғаған) жазуынша, Кашшафуддин ибн Шаһмардан – 27 кітаптың авторы. Оның шығармаларын үшке бөліп қарастыруға болады: автордың төл туындылары, шығыстық үлгідегі қиссалары және халықтық фольклор жинақтары.
Ақынның «Кел, балалар, оқылық» кітабы Ыбырай Алтынсариннің шығармасы негізінде дүниеге келген. Идея-мазмұны өте жақын. К.Шаһмарданұлының шығармасы:
«Бір Алладан тіленіп,
Ғулум, фунун сұранып,
Мәңгі дәулет ізденіп,
Кел, балалар, оқылық!» деген жолдармен басталады.
Бұл басылымда еңбектің факсимилесі, асылмәтіні, ғылыми түсіндірмелері, терминологиялық сөздігі және латын әрпіндегі транскрипциясы берілді
